තරහ වුණාම තමයි එයාගේ ඇත්තම තත්ත්වය පේන්නේ දියණියත් එක්ක තමයි මගේ ජීවිත ගමන

ජනප්‍රිය රංගන හා නිවේදන ශිල්පිනී හිමාලි සයුරංගි මෑතකදී රංගන සමග යූටියුබ් වැඩසටහනකට සහභාගී වූවාය. එහිදී ඇය තම පෞද්ගලික ජීවිතය, වෘත්තීය ගමන්මග, මව් චරිතය සහ කලා ක්ෂේත්‍රය පිළිබඳව අදහස් පළ කළාය. මෙම සම්මුඛ සාකච්ඡාවේදී ඇගේ ජීවිතයේ විවිධ පැතිකඩ පිළිබඳව විවෘතව කතා කළ අතර, කලා ක්ෂේත්‍රයේ සිය ගමන් මග පිළිබඳවද අත්දැකීම් බෙදා ගත්තාය.

කලා නාමය පිළිබඳ රහස

සම්මුඛ සාකච්ඡාව ආරම්භයේදීම හිමාලි තම සැබෑ නම පිළිබඳව හෙළි කළාය. "මගේ සැබෑ නම හිමාලි හිරෝෂිමා රණවීර. නමුත් කලාවට පිවිසෙන විට හිරෝෂිමා යන නම ඉවත් කළා. මගේ පාසල් කාලයේ ළමයි 'හිරෝෂිමා බෝම්බය' කියා විහිළු කළා. ඒ නිසා මා කලාවට ඇතුළු වන විට මා ආදරය කළ නමක් වන 'සයුරංගි' යන නම එකතු කර ගත්තා," යැයි ඇය පැවසුවාය. ඇය පෙන්වා දුන්නේ, 2001 වසරේ පමණ තමා නිවේදිකාවක ලෙස කලාවට සම්බන්ධ වූ බවයි.

පාසල් කාලය හා දහම් පාසල

හිමාලි තම පාසල් ජීවිතය ගැන කතා කරමින්, තමන් ඉතා නිහඬ, ලැජ්ජාශීලී දරුවෙකු වූ බව පැවසුවාය. "මම හරිම ලැජ්ජාශීලී, පසුගාමී චරිතයක්. ගොඩක් වෙලාවට අම්මගේ පිටිපස්සේම හිටියා," යැයි ඇය සිහිපත් කළාය.

ඇගේ මව ඇය දහම් පාසලට යැවූ බව පවසමින්, "මිහිඳු විහාරස්ථානයේ දහම් පාසල මගේ ජීවිතය වෙනස් කළා. දහම් පාසලේදී තමයි මම සභා ඉදිරිපත් කිරීම්, ගායනය, විවාද වැනි දේවල් කරන්න පටන් ගත්තේ. දහම් පාසල මගේ කලා කටයුතුවලට ඉදිරියට එන්න උදව් කළා," යැයි ඇය සඳහන් කළාය.

ආරම්භක අධ්යාපනය ගැන සඳහන් කරමින්, "මුලින්ම කන්යාරාමයක අධ්යාපනය ලැබුවා. පසුව සේන්ට් ඇන්තනීස් විද්යාලයට ගියා. එහි නීති රීති ඉතා දැඩි වූ නිසා මම තවදුරටත් පසුගාමීව හිටියා. නමුත් අනුලා විද්යාලයට ඇතුළත් වුණාට පස්සේ මගේ ජීවිතය සම්පූර්ණයෙන්ම වෙනස් වුණා. ඒක මගේ ජීවිතයේ තවත් ලොකු පියවරක් වුණා," යැයි ඇය පැවසුවාය.

අනුලා විද්යාලයේ ආදි ශිෂ්යාවක ලෙස

හිමාලි අනුලා විද්යාලයේ ආදි ශිෂ්යාවක ලෙස ඒ පාසලෙන් බිහි වූ ප්‍රවීණ කලාකරුවන් ගැන ආඩම්බරයෙන් කතා කළාය. "අනුලා විද්යාලයෙන් ශෂිකා නිසංසලා, දීපිකා ප්‍රියදර්ශනී, මංජුලා කුමාරි සිරිවර්ධන, චරිතා ප්‍රියදර්ශනී, නිහාරි වැනි ප්‍රවීණ කලාකරුවන් රැසක් බිහි වී තිබෙනවා. පාසලේ 'අනුලාවෙන් බිහි වූ කලා ශිල්පීන්' කියලා වෙනම පුවරුවක් තියෙනවා. එහි මගේත් පින්තූරයක් තියෙනවා," යැයි ඇය සඳහන් කළාය.

පාසල් පද්ධතියේ අඩුපාඩු

හිමාලි පාසල් පද්ධතිය තුළ කලා හැකියාවන් ඇති දරුවන්ට ඇති සීමා ගැන විවේචනාත්මකව අදහස් දැක්වූවාය. "සමහර පාසල්වල දරුවන්ට කිසිම දේකට ඉදිරිපත් වෙන්න දෙන්නේ නැහැ. ටීවී එකේ ඉන්න බැහැ, වෙළඳ දැන්වීම් කරන්න බැහැ, චිත්‍රපටයකට ආරාධනා කළොත් යන්න බැහැ. විශාල වාරණ දාලා, විශාල පීඩනයක් දීලා දරුවාගේ හැකියාව යටපත් කරනවා," යැයි ඇය පැවසුවාය.

ඇය තවදුරටත් කියා සිටියේ, "ගුරුවරු සමහර විට පාසල් කාලේදී ළමයින්ට වචනවලින් හිත් රිදවන අවස්ථා ගොඩක් තියෙනවා. කලාකරුවෙක් බිහි වීම ඉතා කලාතුරකින් සිදු වන දෙයක්. ඒ නිසා විශේෂ හැකියාවක් ඇති දරුවෙකු දුටුවිට ඒ දරුවාට උදව් කරන්න, අත දෙන්න කියලයි මම කියන්නේ."

රංගනයට පිවිසීම

තම රංගන ජීවිතය ආරම්භ කළ ආකාරය ගැන හිමාලි පැවසුවාය. "ඇත්තටම මගේ නිවස අසල හිටපු රංගන ශිල්පිනී සුරංගි රුවන්මලී හරහා තමයි මම මුලින්ම රංගනයට සම්බන්ධ වුණේ. ඇගේ නංගිගේ චරිතයකට, 'වාඩි' කියන ටෙලිනාට්‍යයේ, හර්බට් රංජිත් පීරිස් මහතාගේ අධ්‍යක්ෂණයෙන් මම පළමු වරට රඟපෑවා. මම ලූණු සුද්ද කරන රත්නා සුමනපාල මහත්මියගේ දුව ලෙස රඟපෑවා," යැයි ඇය සිහිපත් කළාය.

"හර්බට් රංජිත් මහත්තයා මගේ පළමු රංගනය දැක, ' කෙල්ලේ, ඔයා මීට කලින් රඟපාලා නැද්ද? මේ පළමු වතාවට හරි හොඳට කරනවා' කියලා මාව අගය කළා. ඒ මගේ රංගන ජීවිතයේ ආරම්භයයි. ඊට පස්සේ ළමා පිටිය වැඩසටහනට සම්බන්ධ වුණා," යැයි ඇය පැවසුවාය.

නිවේදිකාවක ලෙස

නිවේදන කටයුතු ගැන කතා කරමින්, "ළමා කාලයේ ළමා වැඩසටහන් නිවේදනය කරන්න ලැබුණා. ඒ අත්දැකීමෙන් තමයි මම නිවේදිකාවක් වෙන්න තීරණය කළේ. අපිට පවුලේ හෝ ඇඳුනුම්කම් ඇති කිසිවෙකු නොසිටි නිසා, අයදුම්පත් යොමු කිරීමෙන් තමයි අවස්ථාව ලබා ගත්තේ. ටීඑන්එල්, ස්වර්ණවාහිනී, ජාතික රූපවාහිනී ආදී මාධ්‍ය ආයතන කිහිපයකට මම සම්බන්ධ වුණා. වයස අවුරුදු 18දී පමණ මම පූර්ණකාලීන නිවේදිකාවක ලෙස වැඩ කරන්න පටන් ගත්තා," යැයි ඇය සඳහන් කළාය.

ආදරණීය දියණිය සහ මවක් ලෙස

හිමාලි තම දියණිය ගැන ආඩම්බරයෙන් කතා කළාය. "මගේ දුවගේ නම වනුෂි ෂෙනාල්යා. 'සේනාවට අධිපති' යන අරුතින් මම එම නම තේරුවා," යැයි ඇය පැවසුවාය.

මවක් ලෙස තම වගකීම් ගැන අදහස් දක්වමින්, "මම දියණියත් එක්ක තමයි මගේ ජීවිත ගමන ගෙනියන්නේ. සියලු වගකීම් මා වෙත පැවරී තිබෙනවා. මම නිළියක් විදියට ගොඩක් වැඩවලට යනවා, රඟපාන්න යනවා, වැඩසටහන්වලට සහභාගී වෙනවා. කොතරම් කාර්යබහුල වුවත්, මම උපරිම ලෙස කාලය මගේ දුවට ලබා දෙන්න උත්සාහ කරනවා," යැයි ඇය පැවසුවාය.

"සමහරු හිතනවා, රංගන ශිල්පීන්ගේ දරුවන්ට අම්මලා තාත්තලා සමඟ විවේකයක් නැතිව ඇති කියලා. නමුත් එසේ නොවේ. මම අනිත් සාමාන්‍ය මව්වරුන් වගේම, මගේ දරුවාව ඉස්කෝලේ යවන්න, කෑම හදන්න, බත් උයන්න පාන්දර 4.30ට නැගිටිනවා," යැයි ඇය අවධාරණය කළාය.

ළඟම මිතුරන් ගැන

තම ළඟම යාළුවන් ගැන කතා කරමින්, "මට ළඟම යාළුවන් කිහිප දෙනෙක් ඉන්නවා. පාසල් කාලයේ මිතුරන් දෙදෙනා වන සමිත් රජ සහ දුලාරා ඕස්ට්‍රේලියාවේ ඉන්නවා. ඊට අමතරව, අභිලාෂිනී, රුචිරා ලියනගේ, මංජුලා තිලිණි, ජයනි සේනානායක, පබෝධා සංදීපනී, සුජානි මේනකා ආදී අය සමඟ මිතුරුකම් පවත්වනවා," යැයි ඇය පැවසුවාය.

මිතුරුකම් ගැන ඇය තවදුරටත් කතා කරමින්, "අපි ජීවිතේට එකතු කරගන්නා යාළුවන් විශ්වාස කිරීම අමාරුයි. ජනප්‍රියත්වය ලබා සිටින විට සමහරු අපට ළං වෙන්නේ තමන්ගේ වාසිය සඳහායි. ඒ නිසා මම ළඟින් තබා ගන්නේ ඉතා සුළු පිරිසක් පමණයි. මගේ හොඳ නරක, අඩුපාඩු, දුර්වලතා දකිමින් ඒවා පිළිගන්නා අය සමඟ පමණයි මම යාළුකම් පවත්වන්නේ," යැයි ඇය පැහැදිලි කළාය.

සමාජ මාධ්‍ය හරහා ඇතිවන අභියෝග

සමාජ මාධ්‍ය හරහා කලාකරුවන්ට ඇතිවන අභියෝග ගැන අදහස් දක්වමින්, "අපේ රටේ සමාජ මාධ්‍ය භාවිතය ඉතා බිංදුවයි. ප්‍රසිද්ධ චරිතයක් අතින් පුංචි වැරැද්දක් සිදු වුවත්, මල් දීපු අත්වලින්ම ගහන ආකාරය බලන විට ඉතා කනගාටුයි. මෙය ජාවාරමක් බවට පත් වී තිබෙනවා. සමහර කණ්ඩායම් සිටිනවා, මඩ ප්‍රචාර ගෙන යන්න, views වැඩි කර ගන්න," යැයි ඇය විවේචනය කළාය.

කලා ක්ෂේත්‍රය ගැන අදහස්

කලා ක්ෂේත්‍රයේ වත්මන් තත්ත්වය ගැන අදහස් දක්වමින්, "මට ලොකු දුකක් නැහැ කලා ක්ෂේත්‍රය ගැන. මෙහෙම හරි කලාව කියල දෙයක් අපේ රටේ තියෙන්නේ සතුටුදායකයි. ක්ෂේත්‍රයට එන සමහර අය වෙන වෙන පරමාර්ථවලින් එනවා. හැබැයි ලොකු දේවල් කරන නිර්මාණ ශිල්පීන් ද ඉන්නවා. මේ දවස්වල හොඳ ටෙලි නාට්‍ය බිහි වෙනවා. හොඳ හොඳ, හොඳ තේරිලා උඩට එන්නේ," යැයි ඇය සඳහන් කළාය.

රූපලාවණ්‍ය ගැන

රූපලාවණ්‍ය ගැන ප්‍රශ්නයකට පිළිතුරු දෙමින්, "මම රූපලාවණ්‍ය කටයුතුවලට ලොකු උනන්දුවක් දක්වන්නේ නැහැ. සැලෝන්වලට යන්නේ ඉතා කලාතුරකින්. ෆේෂල් වැනි දේවල් මම ගොඩක් කරගන්නේ නැහැ. ස්වභාවිකව වයසට යන්න ඕනෑ. කෘත්‍රිම ලෙස පෙනුම වෙනස් කරගැනීමට මම කැමති නැහැ. සැත්කම් වැනි දේවල් කරන්න මම කැමති නැහැ," යැයි ඇය පැවසුවාය.

"මම වයස අවුරුදු 45 සම්පූර්ණ කළා. මගේ වයසේ හැටියට ලස්සනට ඉන්නවා කියලා මම හිතනවා. ජීවිතයේ හැමදේම ටිකෙන් ටික balance එකට කරගෙන යන්න මම කැමතියි," යැයි ඇය එකතු කළාය.
අවසාන පණිවිඩය

සම්මුඛ සාකච්ඡාව අවසානයේදී හිමාලි ප්‍රේක්ෂකයන්ට පණිවිඩයක් ලබා දුන්නාය. "මම සාමාන්‍ය විදියට ජීවත් වෙන්න කැමති කෙනෙක්. එවිට තමයි මට රංගන ශිල්පිනියක් විදියට පොළොවේ පය ගහලා ජීවත් වෙන්න පුළුවන් වන්නේ. මට ආදරය කරන, මගේ කටහඬට, කතා කරන විදියට, රඟපෑ චරිතවලට ආදරය කරන ගොඩක් දෙනෙක් සිටිනවා. ඒ සියලු දෙනාට මම ආදරයෙන් හිස නමා ආචාර කරනවා," යැයි ඇය ප්‍රකාශ කළාය.