මෙම හමුවේදී ඓතිහාසික බේරේ වැව සී ප්ලේන් කඳවුරේ මෙහෙයුම් සැෆ්රන් ඒවියේෂන් (පුද්) සමාගම විසින් මෙහෙයවනු ලබන සිනමන් එයාර් ආයතනයට භාරදීම පිළිබඳව සාකච්ඡා විය. නියමිත සහ වරලත් පාවෙන ගුවන් යානා (float plane) සහ රෝද සහිත ගුවන් යානා සේවා සපයන විශේෂිත සමාගමක් වන සිනමන් එයාර්, ප්‍රධාන කාර්යභාරයක් ඉටු කිරීමට නියමිතය.
ආරක්ෂක ලේකම්වරයා අවධාරණය කළේ, ශ්‍රී ලංකාවේ සංචාරක සහ ආගන්තුක සත්කාර කර්මාන්තය ශක්තිමත් කිරීම සඳහා රජය පුළුල් දැක්මක් ඇති බවයි. මෙම වර්ධනයේ අත්‍යවශ්‍ය සාධකයක් ලෙස දේශීය ගුවන් සේවා වැදගත් බව ඔහු පෙන්වා දුන්නේය. දේශීය මෙන්ම විදේශීය සංචාරකයින්ට වේගවත්, සුන්දර ගමන් විකල්ප ලබාදීම මෙහි අරමුණයි.
මෙම හමුවේදී බේරේ වැවේ සී ප්ලේන් මෙහෙයුම් වල ඓතිහාසික පසුබිම, සමස්ත ආරක්ෂක කරුණු, ගුවන් ගතවීම් සහ ගොඩබෑම් ක්‍රියා පටිපාටි මෙන්ම පාරිසරික ගැටලු සඳහා වගකීමෙන් යුතුව විසඳුම් සෙවීමේ අවශ්‍යතාවය ඇතුළු තීරණාත්මක ක්ෂේත්‍ර කිහිපයක් කෙරෙහි අවධානය යොමු විය. මෙම අභිලාෂකාමී ව්‍යාපෘතියේ සාර්ථකත්වය සහ තිරසාර බව සහතික කිරීම සඳහා සියලු පාර්ශවකරුවන් අතර ඵලදායී සහයෝගීතාවයක් ඇති කර ගැනීම කෙරෙහි අවධාරණය කෙරිණි.
මෙම රැස්වීමට ශ්‍රී ලංකා නාවික හමුදාව, ගුවන් හමුදාව, පොලීසිය, සිවිල් ගුවන් සේවා අධිකාරිය, නාගරික සංවර්ධන අධිකාරිය, මධ්‍යම පරිසර අධිකාරිය, ශ්‍රී ලංකා වරාය අධිකාරිය, ජෝන් කීල්ස් සමූහය සහ සැෆ්රන් ඒවියේෂන් (පුද්) සමාගම නියෝජනය කරන නිලධාරීන් සහභාගී වූහ.