නව නීතිය ක්‍රියාත්මක වීමෙන් පසු ඇයගේ ඉදිරි පියවර පිළිබඳව Daily Mirror පුවත්පතට අදහස් දක්වමින් ඇය පවසා ඇත්තේ කොළඹ නගරයේ තමාට පදිංචි වීම සඳහා මේ වන විට අලුත්වැඩියා වෙමින් පවතින නිවසක් සොයාගත් බවයි.රාජයේ නිවසක පදිංචි වී සිටින ඕනෑම අයෙකුට ඉවත්වීමට පෙර මාස තුනක දැනුම්දීමක් ලබා දිය යුතු බව රෙගුලාසිවලට අනුව සඳහන් වන බවත්, මේ සම්බන්ධයෙන් තමාට මෙතෙක් දැනුම් දී නොමැති බවත් ඇය පැවසුවාය. කෙසේ වෙතත්, ඇය කියා සිටියේ නිවසින් ඉවත්වීමට මාස දෙකකට වඩා කාලයක් නොගන්නා බවත්, අලුත්වැඩියා කටයුතු නියමිත කාලයට පෙර අවසන් වුවහොත් ඊටත් වඩා අඩු කාලයකින් ඉවත් විය හැකි බවත්ය.
සති තුනකට පෙර සිදුවූ ඇද වැටීමකින් පසු උකුල් ඇටය ආශ්‍රිත ශල්‍යකර්මයකින් තමා සුවය ලබමින් සිටින බවත්, මේ වන විට උඩුමහලෙන් පවා පහළට යාමට නොහැකි තත්ත්වයක සිටින බවත් ඇය කියා සිටියාය.
“මට අලුත්වැඩියා කළ යුතු පොඩි නිවසක් හම්බ වුණා. මගේ පුතා කිව්වා සතියකට ඇවිත් මට උදව් කරනවා කියලා. ඒ අතරේ මම සති තුනකට කලින් වැටිලා උකුල් ඇටය කඩාගත්තා. මට උකුල් ඇටය ආශ්‍රිත ශල්‍යකර්මයක් කරන්න සිද්ධ වුණා. ඒක බරපතළ ශල්‍යකර්මයක්. මම දවසට දෙතුන් පාරක් භෞත physiotherapy කරනවා. ඒ නිසා දැනට මට ඒ අලුත් ගෙදරට ගිහින් කිසිම වැඩක් කරන්න බැහැ” යැයි ඇය පැවසුවාය.
නව නීතිය පනතක් ලෙස ක්‍රියාත්මක වීමට පෙර, තමා මේ වන විට පදිංචිව සිටින නිල නිවසේ ඉතිරි ජීවිත කාලයම රජය විසින් තක්සේරු කරන ලද කුලී මුදලක් ගෙවමින් පදිංචිව සිටීමට අවසර ඉල්ලා ජනාධිපති අනුර කුමාර දිසානායක මහතාට ලිපියක් යොමු කළ බවත්, එම ඉල්ලීම ප්‍රතික්ෂේප වූ බවත් ඇය ප්‍රකාශ කළාය. වසර 15ක් ඇතුළත පිළිකා රෝගී තත්ත්වයන් දෙකකින් ජීවිතය බේරාගත් තමන් වැනි වයස්ගත කාන්තාවකට නිවසින් ඉවත්වීම අපහසු බැවින් නව විධිවිධාන යටතේ මේ නිවසේ රැඳී සිටීමට ඉඩ ලබා දෙන ලෙස තමා ඉල්ලා සිටි බවද ඇය පැවසුවාය.
“මම අලුත්වැඩියාවන් සඳහා ගෙවීමටත් එකඟ වුණා,” යැයි කී ඇය, විශ්‍රාම ගැනීමෙන් පසු තමාට නිල නිවස ලෙස ලබා දුන් මෙය ප්‍රතිසංස්කරණය කිරීම, අලුත්වැඩියා කිරීම සහ නවීකරණය කිරීම සඳහා රුපියල් මිලියන 14ක් සිය සාක්කුවෙන් ගෙවා ඇති බවද සඳහන් කළාය.
“මම මෙහෙට එනකොට මෙහි තිබුණේ ගස් කොළන්, තණකොළ කෑල්ලක්වත් නෙවෙයි. තිබුණේ බොරලු විතරයි. මම landscaping කළා. ඒ කාලේ මහින්ද රාජපක්ෂ රජය ඒකට මුදල් ගෙවීම ප්‍රතික්ෂේප කළා,” යැයි ඇය පැවසුවාය.
ජනාධිපතිවරයා වෙත යොමු කළ ලිපියේ මේ වන විට විශ්‍රාම ගොස් සිටින ජනාධිපතිවරුන් පස් දෙනාගෙන් වත්මන් රජය විසින් පරීක්ෂණ නොකළ එකම තැනැත්තිය තමා බවද සඳහන් කළ බව ඇය පැවසුවාය.
“මම කිසිම වැරැද්දක් කරලා නැහැ,” ඇය කීවාය.
“අනුර කුමාර දිසානායක මැතිවරණ වේදිකාවල කෑගහන්න පටන් ගත්ත දවසේ ඉඳන් රටේ ප්‍රශ්න විසඳන්නේ කොහොමද කියලා කිව්වේ නැහැ. ඔවුන් කතා කළේ දූෂණ ගැන විතරයි. ඒක ඇත්තෙන්ම හොඳ දෙයක්. නමුත් තමන්ගේ රජයේ දූෂණ වළක්වා ගන්නේ කොහොමද කියලා ඔවුන් දන්නේ නැහැ. ඔවුන් කරන්නේ වංචාකරුවන් අල්ලනවා කියලා කෑගහන එක විතරයි. රට දියුණු කරනවා ගැන එක වචනයක්වත් කිව්වේ නැහැ. අධ්‍යාපනය අවුල් වෙලා. සෞඛ්‍ය අවුල් වෙලා. ඔවුන්ගේ තිබුණු එකම සටන් පාඨය තමයි හිටපු ජනාධිපතිවරුන් ඔවුන්ගේ නිවෙස්වලින් එළවලා දාන එක. මම ඒ ගැන කිසිම දෙයක් හිතුවේ නැහැ. බොහෝ රටවල මෙවැනි දේවල්වලට වඩා වරප්‍රසාද තියෙනවා. ඉන්දියාවේ වුණත් මේ වගේ හොඳ වරප්‍රසාද තියෙනවා,” කුමාරතුංග මහත්මිය පැවසුවාය.
“මට කොළඹ ගෙයක් නැහැ. මගේ එකම ගෙදර තිබුණේ රොස්මිඩ් පෙදෙසේ. මම ඒක වික්කා. මම ජීවත් වෙන්නේ ඒ සල්ලිවලින්. මම දූෂණවලට සම්බන්ධ වෙලා නැහැ.” ඇය කීවාය.
තමාට කුලී නිවාස සොයන විට නිවාස කුලියට දීමට කැමති අය සිටි බවද ඇය පැවසුවාය.
“මම මේ ගෙවල් පරීක්ෂා කරලා ඒවාට එකඟ වුණාම, අයිතිකරුවන් නොයෙකුත් හේතු කියමින් ගනුදෙනු ඉදිරියට ගෙන යන්න කැමති වුණේ නැහැ. ඊට පස්සේ මට ආරංචි වුණා JVP එකේ මාධ්‍යකාරයා වන ‘සුදා’ මට අපහාස කරපු නිසා ඔවුන් බය වෙලා කියලා. ඔහු අසභ්‍ය භාෂාවෙන් මට අපහාස කරන්න පටන් ගත්තාම, ගෙවල් අයිතිකාරයෝ JVP එකෙන් කරදර කරයි කියලා බය වුණා.”