මහජන ආරක්ෂක අමාත්යාංශයේ නිල වෙබ් අඩවියේ සඳහන් රාජ්ය ලාංඡනය, රටට අපකීර්තියක් වන අයුරින් විකෘති කර ප්රදර්ශනය කිරීම සම්බන්ධයෙන් පුළුල් පරීක්ෂණයක් පවත්වන ලෙස ඉල්ලා අපරාධ පරීක්ෂණ දෙපාර්තමේන්තුවට (CID) පැමිණිල්ලක් ඉදිරිපත් කර තිබේ.වෛද්ය හා සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සන්ධානයේ සභාපති, විශේෂඥ වෛද්ය චමල් සංජීව මහතා විසින් මෙම පැමිණිල්ල ඉදිරිපත් කරන ලදී.
පැමිණිල්ල ඉදිරිපත් කිරීමෙන් අනතුරුව මාධ්ය වෙත අදහස් දැක්වූ විශේෂඥ වෛද්ය චමල් සංජීව මහතා පෙන්වා දුන්නේ, අදාළ වෙබ් අඩවියේ ඇති රාජ්ය ලාංඡනයේ සිංහයා, ධර්ම චක්රය, වී කරල්, පුන්කළස, ඉර-හඳ සහ පලාපෙති යන අංග පාර්ලිමේන්තුව මඟින් අනුමත නිවැරදි ක්රමවේදයෙන් බැහැරව විකෘති කර ඇති බවයි.
"අවම වශයෙන් පස්වන ශ්රේණියේ දරුවකුට පවා රාජ්ය ලාංඡනය පිළිබඳ පැහැදිලි අවබෝධයක් තිබියදී, මෙවැනි වෙනසක් සිදුවීම නොදැනුවත්කම මත සිදු වූවක් ලෙස සැලකිය නොහැකියි. මෙය මෙරට ආරක්ෂක අමාත්යාංශය සහ රාජ්යය බරපතළ ලෙස හෑල්ලුවට ලක් කිරීමක්," යැයි ඒ මහතා පැවසීය.
රටක රාජ්ය අනන්යතාව නිරූපණය කරන ලාංඡනය මෙලෙස අත්තනෝමතික ලෙස වෙනස් කිරීම ජාතික ආරක්ෂාවට මෙන්ම රාජ්යයේ කීර්ති නාමයට ද එල්ල වූ බරපතළ පහරක් බව ඔහු අවධාරණය කළේය. පසුගිය කාලසීමාව පුරා රජයේ වෙබ් අඩවිවල මෙවැනි විකෘති කිරීම් සිදු වුවද, ඒවා සම්බන්ධයෙන් නිසි විමර්ශන සිදු කිරීමට ආරක්ෂක අංශ අසමත් වීම කණගාටුවට කරුණක් බව ද හෙතෙම පෙන්වා දුන්නේය.
මෙරට අධ්යාපන පද්ධතියේ වෙනස්කම් සහ සෞඛ්ය පද්ධතිය පෞද්ගලික අංශය සමඟ ඒකාබද්ධ කිරීමට උත්සාහ ගන්නා පසුබිමක, රාජ්ය ලාංඡනය ද මෙලෙස වෙනස් කිරීම හුදෙකලා සිද්ධියක් ලෙස බැහැර කළ නොහැකි බව වෛද්යවරයා වැඩිදුරටත් ප්රකාශ කළේය.
මේ සම්බන්ධයෙන් වහාම ස්වාධීන පරීක්ෂණයක් පවත්වා වගකිවයුත්තන්ට එරෙහිව නීතිය ක්රියාත්මක කරන ලෙස ඔහු රජයෙන් ඉල්ලා සිටියි.