රජය සතු වතුවලින් ලැබෙන පොල් අවම මිලකට වෙන්දේසි කළද අතරමැදියන් මෙම තොග මිලදී ගෙන වෙළඳපොලේ ඉතා ඉහළ මිලකට අලෙවි කරන අතර එමඟින් සැලකිය යුතු ලාභයක් ලබා ගනී.
මෙම ක්‍රියාව පොල් වගාකරුවන්ට සහ පාරිභෝගිකයින්ට අසාධාරණ අවාසි ඇති කරයි.
පසුගිය වසරේ අගෝස්තු මාසයේ සිට පොල් අස්වැන්නේ පහත වැටීමක් දක්නට ලැබුණද පොල් මිල රුපියල් 200 ට වඩා ඉහළ මට්ටමක පැවතීම අර්බුදකාරී තත්වයක් පෙන්නුම් කරයි.
මැයි සහ ජුනි මාසවල පොල් ගෙඩි මිලියන 555 ක අස්වැන්නක් ලැබෙනු ඇතැයි පුරෝකථනය කර තිබුණද නිෂ්පාදනයේ අපේක්ෂිත වැඩිවීමක් තිබියදීත් මිල අඛණ්ඩව ඉහළ යාම පිළිබඳව සාකච්ඡාවේදී කනස්සල්ල මතුව ඇත.
ඊට විසඳුමක් ලෙස ඉදිරියට පොල් තොගයෙන් කොටසක් පමණක් වෙන්දේසි හරහා අලෙවි කිරීමට යෝජනා කරන ලද අතර ඉතිරි කොටස සතොස අලෙවිසැල් සහ සමුපකාර හරහා සහනදායී මිල ගණන් යටතේ මහජනතාවට බෙදා හරිනු ඇත.
ජනාධිපති අනුර කුමාර දිසානායක මහතා ද පොල් මිල ඉහළ යාම සැලකිල්ලට ගෙන ඒ පිළිබඳව සොයා බලා ඇති අතර මිල ස්ථාවර කිරීම සඳහා සැලැස්මක් සකස් කරන ලෙස කෘෂිකර්ම අංශයේ ඉහළ නිලධාරීන්ට උපදෙස් දී තිබේ.
මෙයට සමගාමීව පොල් නිෂ්පාදනය ඉහළ නැංවීම සඳහා ලබන මාසයේ සිට වැඩසටහන් කිහිපයක් ක්‍රියාත්මක කිරීමට පොල් වගා කිරීමේ මණ්ඩලය සූදානම් වේ. රජය සතුව දැනට පොල් වගාවන් අක්කර ලක්ෂයකට ආසන්න ප්‍රමාණයක් තිබුණද මෙම ඉඩම් බොහොමයක් ඌන උපයෝජිත ඉඩම් බව සාකච්ඡාවේදී අනාවරණය විය.
ඒ අනුව රජය මෙම ඉඩම් සංවර්ධනය කිරීම කෙරෙහි අවධානය යොමු කර ඇත.
ඉදිරි මාසවලදී පොල් අස්වැන්න නැවතත් පහත වැටිය හැකි බවත් එමඟින් තවත් මිල ඉහළ යාමක් සිදුවිය හැකි බවත් මණ්ඩලයේ අදහසයි.