දැනට, මහින්ද රාජපක්ෂ මහතා එම නිල නිවසේ රැඳී සිටින්නේ බලහත්කාරයෙන් නොව, ආණ්ඩුක්‍රම ව්‍යවස්ථාවට අනුව ලැබී ඇති අයිතියක් වශයෙනි.
නමුත්, පාර්ලිමේන්තුවේ ඉදිරිපත් කර ඇති නව පනත් කෙටුම්පත සම්මත වී නීතියක් බවට පත් වූ පසු, එයට අනුකූලව මහින්ද රාජපක්ෂ මහතා එම නිල නිවසින් ඉවත්වීමට සූදානම් බව මන්ත්‍රීවරයා ප්‍රකාශ කළේය.
විධායක ජනාධිපතිවරයෙකුට ඇතැම් බරපතළ තීන්දු ගැනීමට සිදුවන අවස්ථාවලදී, ධූරයෙන් ඉවත් වූ පසු විවිධ අවදානම්වලට මුහුණ දීමට සිදුවිය හැකි බව මන්ත්‍රීවරයා පෙන්වා දුන්නේය.
එම නිසා, ඔවුන් වෙනුවෙන් යම් ආරක්ෂක වැඩපිළිවෙළක් ක්‍රියාත්මක විය යුතු බව ඔහු පැවසීය. මෙය වත්මන් ජනාධිපතිවරයාට මෙන්ම හිටපු ජනාධිපතිවරුන්ට ද එකසේ අදාළ බව ඔහු සඳහන් කළේය.
වත්මන් ජනාධිපතිවරයා පාතාල මර්දනය සඳහා කටයුතු කළත්, ඔහු ධූරයෙන් ඉවත් වූ පසු, පාතාලයෙන් එල්ල විය හැකි ප්‍රතිරෝධයට මුහුණ දෙන්නේ කෙසේදැයි මන්ත්‍රීවරයා ප්‍රශ්න කළේය.
මෙවැනි අවස්ථාවන් සඳහා, ධූරය දරන කාලයේදී තීරණ ගැනීම පහසු කිරීම පිණිස විශ්‍රාමික ජනාධිපතිවරුන්ගේ ජීවිත ආරක්ෂාව සහතික කිරීම ආණ්ඩුක්‍රම ව්‍යවස්ථාව මඟින් මෙතෙක් සිදුකර තිබූ බව ඔහු වැඩිදුරටත් කියා සිටියේය.