ඒ අනුව, “සෝන්- ශ්‍රී ලංකා, ආර්ථික කොමිසම”, ජාත්‍යන්තර වෙළෙඳාම සඳහා වන කාර්යාලය, ජාතික ඵලදායීතා කොමිසම සහ ජාත්‍යන්තර වෙළෙඳාම සඳහා වූ ශ්‍රී ලංකා ආයතනය යනුවෙන් ආර්ථික පරිවර්තන පනතේ එන ආයතන 5 පිහිටු වීමට ක්‍රියා කළ හැකි බව ඇමරිකානු රාජ්‍ය දෙපාර්තමේන්තුව නව වාර්තාව ආණ්ඩුවට පෙන්වා දෙයි.
ඇමරිකානු රාජ්‍ය දෙපාර්තමේන්තුව මෙම වාර්තාව පළ කරන්නේ විදෙස් ආයෝජන වැඩි කර ගැනීම සඳහා ව්‍යාපාරික හා රාජ්‍ය අංශ වලට උදවු කිරීම අරමුණු කරගෙනය.
ශ්‍රී ලංකාවේ විදෙස් ආයෝජන පරිසරය ස්ථිර නොවන බවත් ආයෝජන ලැබීම සීමාසහිත බවත් ඇමරිකානු රාජ්‍ය දොපාර්තමේන්තුව නව වාර්තාව ඔස්සේ පැහැදිලි කරයි.
ඒ අනුව, ආර්ථික පරිවර්තන පනතට අදාළ ආයතන පිහිටුවා ආයෝජන මණ්ඩලය අහෝසි කරන ලෙස එමඟින් නිර්දේශ කර තිබේ.
ආයෝජන මණ්ඩලය අහෝසි කිරීමේ අරමුණින් 2024 ජූලි මස ආර්ථික පරිවර්තන පනත සම්මත කළත් ආයෝජන මණ්ඩලය තවමත් ක්‍රියාත්මක වන බව ඇමරිකානු රාජ්‍ය දෙපාර්තමේන්තුව කියයි.
ආයෝජන සඳහා වන බාධක ඉවත් කිරීම, ආයෝජන මණ්ඩලයේ නිලධාරීන්ගේ නිලධාරිවාදය නැති කිරීම, ආයෝජන ව්‍යාපෘතියකට අනුමැතිය ලබා ගැනීම ප්‍රමාද වීම වැළැක්වීම, ප්‍රතිපත්ති වල ස්ථාවරභාවය පවත්වා ගැනීම, රාජ්‍ය හිමිකාරීත්වය නැති කර පෞද්ගලීකරණය කිරීම වැදගත් බව කියයි.
ඇමරිකන් රාජ්‍ය දෙපාර්තමේන්තුවේ වාර්තාව වැඩි දුරටත් පෙන්වා දෙන්නේ ශ්‍රී ලංකා ආයෝජන මණ්ඩලය ප්‍රධානම ආයෝජන ප්‍රවර්ධන නියෝජිතායතනය වුවද ඔවුන් සමඟ ස්ථාවර හා විවෘතසම්බන්ධයක් පවත්වා ගැනීම අභියෝගයක් වන බවයි.
ශ්‍රී ලංකා ආයෝජන මණ්ඩලයෙන් විදෙස් ආයෝජකයකුට කිසියම් ආයෝජනයකට අනුමැතිය ලබා ගැනීම ඉතාමත් දුෂ්කර කරුණක් වනවා සේම දීර්ඝ කාලයක් ගත වන කරුණක් බවත් එය ඉතාම අපහසු වැඩක් බවත් මෙකී වාර්තාව මඟින් කියයි.
ඒ අනුව ආයෝජන මණ්ඩලය අහෝසි කර, ආර්ථික පරිවර්තන පනත බලාත්මක කර එම පනතේ සඳහන් ආයතන පිහිටුවීමට කටයුතු කළ හැකි බව පෙන්වා දෙයි.
මේ අතර පසුගිය රනිල් වික්‍රමසිංහ ආණ්ඩුව ආර්ථික පරිවර්තන පනත සම්මත කළේ ආයෝජන බාධක නැති කිරීම හා ආයෝජන වර්ධනය සඳහාය. රනිල් වික්‍රමසිංහ ආණ්ඩුව එකී පනත 2024 ජූලියේ සම්මත කළත් ඊට අදාළ ආයතන මේ දක්වා පිහිටුවා නැත.